الرئيس السيسي: وضعنا برنامجا ضخما للانطلاق بمعايير الدولة الحديثة

قال الرئيس عبد الفتاح السيسي، إنه يجب تحديد عدة أمور أو نقاط مرت على مصر خلال الـ10 سنوات الماضية، متابعا: "لو عاوزين الإجابة فيها سهولة ويسر.. على سبيل المثال لو أي بيت تعرض لمشكلة هذه المشكلة يكون لها تأثير على البيت لفترة.. لو بنتكلم على المدى القصير لمصر يبقى 10 سنوات".

وأضاف الرئيس السيسي، خلال تفقد الأكاديمية العسكرية المصرية: "خلال الـ 10 سنوات الماضية تعرضت مصر لأمور كثيرة بداية من أحداث التغيير التي تمت فى أعوام 2011 و2012 و2013.. ولما بنتكلم عن الأحداث دي مفيش حاجة بتتعمل مش بيكون لها أثر وتكلفة".

وتابع الرئيس السيسي، الدولة المصرية حققت نجاحا كبيرا فى مجال الطاقة، متابعا: "كان عندنا أزمة قبل عام 2014 فى محطات إنتاج الكهرباء.. وعلشان تعمل كهرباء تعمل 3 حاجات.. إنتاج الطاقة نفسها ومكانش عندنا المحطات اللي تكفي.. وشبكة لنقل هذا الإنتاج.. ومحطات التحكم لتنظيم أداء هذه الشبكة.. علشان لما يحصل مشكلة ما نقدر ننظم الكهرباء بشكل أو بآخر".

وواصل: "ده قطاع واحد ونقدر نتكلم فى القطاعات.. تضاعف إنتاج الكهرباء.. وحد يقول الصيف اللى فات وقبله كانت الكهرباء بتتقطع.. فيه فرق أني بقطع الكهرباء علشان أنا مش قادر اجيب الطاقة دي.. ودي بالعملة الحرة وانا مش بيبيع بتمنها الحقيقي.. ببيع لكتلة كبيرة بربع ثمنها".

وتابع الرئيس السيسي: "تفتكرا أنبوبة البوتجاز ثمنها كام.. تمنها 325 – 340 جنيها.. وتباع بـ 150 جنيها.. يعني أقل من نص تمنها.. كام أنبوبة فى السنة.. حوالي 300 مليون أنبوبة فى السنة".

واختتم الرئيس قائلا، إن الاحتياطي الخاص بالدولة المصرية انتهي "كله خلص" خلال أعوام التغيير 2011 و2012 و2013، متابعا: "ده كان عبارة عن ايه.. القدرة الاقتصادية للدولة على تلبية الاحتياجات لعدد معين من الشهور".

مشيرًا إلي أن  ما تحقق فى الدولة المصرية خلال السنوات الماضية إنجازا؟.. لو قولت إنجاز يبقى بميز نفسي وبميز الحكومة أنها عملت.. وضعنا برنامج ضخم وقعدنا نشتغل فيه 10 سنوات لتهيئة الدولة المصرية للانطلاق بمعايير الدولة الحديثة.. مثل شبكة الطرق ولا يمكن اختزال الجهد والخطة فى شبكة الطرق.. والموضوع أكبر من كده.. دي خطة شاملة تشمل الطاقة".