"أبو ريدة "يشد من أزر الفراعنة: أنتم تمثلون 250 مليون عربى

عقد المهندس هانى أبو ريدة رئيس الاتحاد المصرى لكرة القدم جلسته المعتادة مع لاعبي المنتخب الوطنى قبل أى مباراة، وذلك قبل نهائي بطولة إفريقيا أمام الكاميرون مساء اليوم الأحد، من أجل الحديث معهم عن اللقاء وحثهم على الفوز.

وبدأ أبو ريدة الجلسة،  موجها حديثه للاعبين حيث قال: "الناس كلها فرحانة فى مصر والدول العربية كمان...وبأحمد ربنا ان الرجالة دى هى سبب فرحة الشعب المصرى والعربى كله...وانا متاكد ان كل واحد فيكم دلوقتى حاسسس بقيمته وقيمة فانلة منتخب مصر...مانتسوش بانكم مش بتلعبوا بس عشان تسعدوا 90 مليون مصرى بس لكن اكتر من 250 مليون عربى كلهم وراكم وبيشجعوكم".

وتابع: "كل مرة بنقول الحمد لله بعد كل فوز وربنا بيكرمنا عشان الاخلاص اللى جواكم انتم والجهاز الفنى والادارى والناس كلها بتدعيلكم قوى وانا بجد فرحان عشان فرحة الناي الى بتنزل عشان تتفرج عليكم فى الشوارع والميادين وتحتفل بعديها".

وأضاف: "انا فخور بيكم جدا لانكم تعبتم واستبسلتم فى المباريات اللى فاتت لحد ماوصلتم للنهائى ومابخلتوش باى مجهود حتى المصابين باحييهم...انا عندى شعور قوى ان ربنا حيكافئنا بكرة....الناس كلها مستنياكم فى مصر....حتجتهدوا فى الملعب زيكون عندكم اصرار وعزيمة وتفكروا وتساعدوا بعض عشان ربنا ينصرنا ونرجع بالكاس".

واختتم : " انا فرحان وفخور بالجيل دة اوى لانكم فعلا رجالة وجيل محترم ويستحق الفوز بهذه الكاس والتاهل كمان لكاس القارات فى 2017 وكاس العالم ان شاء الله فى 2018....انتم جيل كسب احترام العالم".