«كلم ربنا».. نشوى مصطفى تروي لحظة وفاة زوجها بين يديها: نزلت القبر وشممت رائحة المسك

استضاف برنامج «كلم ربنا» الذي يقدمه الإعلامي أحمد الخطيب عبر إذاعة الراديو 9090 الفنانة القديرة نشوى مصطفى، التي كشفت عن أصعب لحظة في حياتها مؤكدة أن أصعب لحظة في حياتها لماّ دخلت القبر علشان أدفن زوجي اللي راح مني وسابني بعد عِشرة ٣٣ سنة، مكنش مريض ولا بيشتكي من حاجه، فجأه تِعب بالليل، خدته في حضني ومات علي كتفي، وشوفت بعيني روحه وهيا بتطلع، بعد ما استقبل القِبله ونطق الشهادتين، ومشي في سلام.

وأوضحت نشوى مصطفى أنها قالت نصًا: جوزي عُمره ما اشتكي من تعب ولا دخل مستشفي أو راح لدكتور، علي عكسي أنا اللي عملت 3 عمليات في القلب وحالتي الصحيه فيها مشاكل، يعني اللي المفروض بموت أنا مش هو، وعلشان كده كنت منتظره يومي، مش يومه.

وأضافت أنها روت تفاصيل اللحظات الأخيرة قائلة: وهو بيموت في حضني كان بينادي بصوت عالي علي ربنا ويقول يارب ومرة واحده بص ناحية القبله بإبتسامة وكأنه شايف حاجة جميلة قدامه، ولحظة خروج روحه كانت صعبة، لكن شفت فيها جمال وراحة.

وأكدت أنها قبل الدفن رحت المقابر، واستأذنت إني أنزل أشوف مكانه، شمّيت ريحة مسك جميلة، ونمت مكانه جوه التُريه عشان أشوف هيحس بإيه، مشيرة إلى أن المقبرة كانت واسعة، وناس كتير حضرت الدفنة رغم خوفي إن محدش يجي، لكن حسّيت إنه رايح مكان أحسن.

وقالت نشوى مصطفى إن جوزي كان أعظم وأحنّ راجل في حياتي، اتجوزنا من 33 سنه، كان فيها كل حاجه، صديقي وأبويا وأخويا وحبيبي وسندي وضهري، ولحد دلوقتي لسه موجود معايا، ممتش، بيكلمني وأكلّمه، ريحته لسه في سجادة الصلاة بتاعته وأنا بصلي عليها، لمّا بخرج م البيت بستأذنه، ولمّا برجع بنادي عليه واقوله: ياعماد أنا رجعت.

واستعادت نشوى مصطفى تفاصيل نشأتها مؤكدة: أنا اتولدت واتربيت في شبرا، أزهريه وحافظه القرآن، عشت حياة بسيطة، أبويا كان شغال سواق في المصانع الحربية، ووداني الكُتّاب عشان أحفظ القرآن، كنت شاطرة جدًا وطلعت الأولى على الجمهورية في الشهادة الابتدائية الأزهرية، وفي الثانويه دخلت مدرسة جمعية الإيمان الأرثوذكسية المسيحية.

وأضافت: إحنا خمس إخوات، أنا الكبيرة بينهم، أمي وأبويا كانوا بيعملوا جمعيات علشان يصرفوا علينا في المدارس والمجموعات، واشتغلت في العتبة بيّاعة في محل ملابس وأنا في الجامعة، كنت بكسب من عرق جبيني، وعلشان بحب التمثيل قررت أدخل معهد الفنون المسرحية، لكن أبويا رفض وقاللي إن ده هيأثر على تعليم إخواتي، فقررت أبيع سندوتشات في العتبة على زمايلي البياعين.

واختتمت الفنانة القديرة نشوى مصطفى حديثها قائلة: الدرس اللي فهمته في محنة وفاة زوجي هو إن ربنا هو سندي الحقيقي، الواحد الأحد، جوزي هو وسيلة ربنا في حياتي، ودلوقتي أنا متونسه بربنا، الكل يذهب ويبقي الله .. هو الباقي.