منوعات
استشاري التغذية العلاجية يكتشف برنامج إعادة هندسة منظومة العادات لمرضي السمنة
الإثنين 12/أغسطس/2024 - 07:40 م
طباعة
sada-elarab.com/734522
قال الدكتور محمد حسن نصر، استشارى العلاج الطبيعي والتغذية العلاجية بالمنصورة وكفر الشيخ، ناس كتير بتسأل دكتور محمد ليه نظامك مختلف فى التخسيس وإيه الجديد اللي بتعمله؟؟
وتابع «نصر»، عبر صفحته علي موقع التواصل الاجتماعي «الفيسبوك بوك»، هقولكم بكل بساطة الفكرة، كلنا زهقنا من إننا بنعامل جسمنا بدون فهم، مجرد رجيم نمشي عليه وخلاص ونرجع نكرر الأسبوع اللي بعده وبعد ما نخس شوية، نرجع نلخبط كل اللي عملناه ونزيد في الوزن تاني وييجي الإحباط اللي بيخلينا نروح ناكل أكتر فنزيد أكتر ونحبط أكتر وهكذا في دوامة مقفولة.
واستطرد قائلا: مش هي دي فكرتي عن علم التغذية ولا هو ده اللي عايزين نعيش بيه، لما بدأت أراقب أكتر لقيت إن المشكلة كلها في عاداتنا بشكل أساسي، هي اللي بتحركنا في كل حاجة في حياتنا.
وأضاف «نصر»، لقيت إن الناس اللي عايشة بصحة ورشاقة ليهم عادات بتخليهم يبقوا كدة أما اللي صحته ملخبطة ووزنه زايد فبشكل أساسي عاداته برضه هي اللي وصلته لكده.
وأكد «نصر»، الفكرة بدأت تتطور، طورت برنامج متكامل وبدأنا نشتغل مع الناس على منظومة العادات بتاعتهم, إكتشفت إن ممكن إتنين إخوات تخان ممكن يكون ليهم عادات مختلفة هي اللي وصلتهم لكدة، وعشان كدة لما بنشتغل مع كل واحد على إعادة هندسة منظومة عاداته بيبدأ فعلا يحصل تغيير، تغيير في شكله ووزنه وصحته وشخصيته وكدة البرنامج مرن جدا حسب إحتياجات كل شخص.
وأضاف «نصر»، كمان لقيت مفاجأة!! معظم الناس اللي خضنا الرحلة دي مع بعض وطبقوا البرنامج على الرغم من إنهم بذلوا مجهود عالي جدا إلا إن الأغلبية أجمعت إن الموضوع مكانش صعب، مكانش فيه حرمان، تركيزي كله كان على إعادة تنظيم العادات لدرجة إن الناس بقت تتفاجئ إنها خست وتسأل هو ده حصل إزاي!!
وأكد أن برنامج إعادة هندسة منظومة العادات بيحتاج نقعد مع بعض نستكشف ونخطط، مفيش كشف، فيه «Session»، بنقعد فيها أنا وإنت نتكلم ونخرج أنماط العادات السلبية ونبدأ نشتغل عليها ونغلط ونعيد ونغير لحد ما نوصل لأفضل وضع مناسب ليك ولعاداتك .
واختتم «نصر»، مقدرش أقول إن الموضوع سحر لأن السحر في الأفلام، ولا أقدر أقولك إنك هتخس بسرعة وإنت قاعد على الكنبة بتشرب صودا، الموضوع محتاج صبر ومجهود لكن اللي أقدر أقوله إنك لما تبدل العادات اللي وصلتك لمشكلتك سواء في وزنك أو صحتك بعادات جديدة إيجابية ونثبتها صح، حياتك هتكون أسهل كتييير بعد كدة.
