طباعة
sada-elarab.com/609560
التوعية الأولى.. "غسيل الأيدى"
زمان قالوا لنا "الوقاية خير من العلاج".....كلام سليم، من دهب، يتشال ع الراس.
أول خطوة في الوقاية من فيروس كورونا هى غسيل الإيدين.....ماتستهونش بالخطوة دي؛ كل الفيروسات و الميكروبات طول ماهى برة الجسم بتكون ضعيفة و القضاء عليها بيبقى أسهل، لو إيدك مش نضيفة بتكون عليها ميكروبات كتير و ساعتها إيدك بتكون خطر عليك و على كل حاجة بتلمسها، بمجرد مابتغسل إيدك بالماية و الصابون بتقضي على كل الميكروبات الضارة دي و بتحمي نفسك و اللي حواليك.
إغسل إيدك بماية فاترة و أي نوع صابون لمدة 20 ثانية، إدعك كل جزء في إيدك كويس و الصوابع و باطن الإيد و ضهرها و بعدين اشطفها بالماية.....طب لو انت برة البيت و مفيش ماية و صابون قريبين عليك و محتاج تغسل إيدك تعمل إيه؟ بسيطة؛ بخاخ صغير تشيله معاك دايما و انت خارج تكون ماليه كحول أبيض طبي تركيزه 70% تستخدمه عند الحاجة.
خليك فاكر دايما؛ غسيل الإيدين مش بس نضافة، غسيل الإيدين وقاية و حماية من الأمراض، وقاية من غير تكاليف، وقاية من غير تعب، و الوقاية خير من العلاج.
