اخبار
والدة شهيد الشرطة للسيسي: درسوا قصص ولادنا عشان يفضلوا في ذاكرة الشعب
الأحد 22/مارس/2020 - 06:37 م
طباعة
sada-elarab.com/447781
قالت سهام مصطفى كمال، الأم المثالية لأم شهيد من وزارة الداخلية، إن الرئيس عبدالفتاح السيسي، سنّ سنة رائعة، وهي تكريم أهالي الشهداء، مشيرةً إلى أنه أول رئيس "في الدنيا" يفعل مثل هذا الأمر.
وأضافت خلال حضورها لقاء الرئيس عبدالفتاح السيسي، بعدد من سيدات مصر، بمناسبة الاحتفال بعيد المرأة المصرية: "سعادتي مضاعفة بوجودي هنا، وابني ميغلاش على اللي خلقه، وميغلاش على البلد".
وتابعت: "أتمنى إن ولادنا يفضلوا في ذاكرة الشعب، إحنا بنتكرم دلوقتي في شخصهم، بس بعد ما نروح حكايتهم تتنسي، نفسي قصصهم تتألف في المدارس، والشباب اللي قاعد على فيس بوك، يهبد ويشتم في البلد، ومش عارف قيمة اللي حصل والتضحية اللي قدموها، وميبقاش مصيرها مصير دول تانية اتفككت، أتمنى إن حضرتك تتولى الحكاية دي".
وواصلت: "بطولات الشرطة متتعدش، وابني سايب ابن عنده سنة ونص، ومراته اترملت وهي عندها 27 سنة، وحاجات زي كده، نفسي تبقى في ذاكرة الناس، أد إيه البلد دي غالية واتدفع فيها مهر، وسابولهم الحسرة، نفسي كل ده يفضل معروف ويفضلوا في ذاكرة البلد".
ورحب الرئيس بها، وقال: "لو بنطلق أسماء الشهداء على الشوارع والميادين، فهي محاولة مننا للي حضرتك تفضلتِ بيه، لكن كمان، في التلفزيون المصري أمهات الشهداء بيتكلموا عن أبنائهم".
وواصل: "أكدت مع وزير الدولة لشؤون الإعلام، إن القصص كتير ونسجلها على مدار السنة، لتذكيرنا بالتضحيات والتكلفة الكبيرة اللي دفعتها الأمهات، لأن الأمهات والزوجة، هي اللي بتتألم، مهما كان شعورها الوطني وصلابتها".
