محافظات
وقفة احتجاجية أمام مدرسة لعدم وجود فصول ببنها
الخميس 09/مايو/2019 - 05:08 م
طباعة
sada-elarab.com/146189
نظم أولياء الأمور وطلبة مدرسة الشهيد عمر بيومي التجريبية لغات ببنها صباح اليوم الخميس وقفة احتجاجية أمام المدرسة مطالبين فيها تدخل رئيس الجمهورية ووزير التربية والتعليم بإنقاذ أبنائهم وتوفير فصول للطلبة فى المرحلة الإعدادية.
حيث أكد أولياء الأمور أن المدرسة لا يوجد بها فصول لأبنائهم الصاعدين من المرحلة الابتدائية للإعدادية مما يؤدي إلي صعوبة أولياء الأمور فى اصطحاب أبنائهم لأكثر من مدرسة فى أكثر من مكان.
ورفع أولياء الأمور لافتات تحمل عبارات " يا ريس أنقذ أولادنا فى التعليم التجريبي.. يا وزير التعليم ابني أوديه فين ..أنا أرملة أودي أولادي فين ..حرام عليكم التعليم التجريبي بينها.. يا وزير التعليم مكان لكل طالب هذا مطلبنا - أودي أولادي فين.
بينما رفع بعض الطلاب لافتات تحمل عبارات " أنا إخواتي فى المدرسة مش عايزة اسيبها - انا مش عايزة اسيب مدرستي - ليه تطردونا من مدرستنا - يا وزير التعليم الأمل موجود وفر لنا فصول".
وأكدت الدكتورة أمل حازم أحد أولياء أمور مدرسة عمر بيومي وعضو مجلس أمناء المدرسة أن سبب الوقفة هو إحتجاجا منهم علي سوء المعاملة من مديرة التعليم الإعدادي بالمديرية عندما توجهت للمديرية لتقديم شكوي فكان رد المديرة لها " روحوا فى داهية والطلبة تروح فى ستين داهية" وانا لم أرد عليها لأني صدمت من ردها، ولكن هذا ليس أسلوب مسئول بالتربية والتعليم.
وأضافت أمل، أيضا من أسباب الوقفة هي المطالبة بتوفير فصول لأبنائنا في المرحلة الإعدادية حيث إن المدرسة حاليا يوجد بها 4 فصول رياض اطفال و13 فصل إبتدائي فى مراحل مختلقة منهم فصلين بالصف الأول الأبتدائي وفصلين الصف الثاني وفصلين الصف الثالث و3 فصول رابعة و3 فصول خامسة وفصل واحد سنة سادسة وكل فصل لا يقل فيه عدد الطلبة عن 50 طالب وطالبة.
وأضافت أمل، أن العام القادم سيتم تصعيد طلاب الصف السادس بعد نجاحهم إلي المرحلة الإعدادية وهنا تكمن المشكلة حيث لا يوجد لهم مكان يستوعب المرحلة الإعدادية ولا نعرف أين سيتم تسكينهم فى أي مدرسة وففى أي منطقة مما يؤثر على نفسية الجميع.
فيما تقول إحدي أولياء الأمور، ان المدرسة قبلت ابنائها الثلاثة علي انها هيكون بها مرحلة تعليم اعدادي وعلي هذا الاساسا نقلت اولادي من مدرسة احمد زويل، والاولاد حاليا كبروا وحضرتك هتاخدهم بعد كدا علي مدرسة تانية وتقولي تنمر زي ما التربية والتعليم بتقول، يعني ترمي 40 طالب وسط مدرسة ما يعرفوش عنها حاجة.
واضافت، ابنائي بيركبوا حاليا 3 مواصلات لكي يحضروا لهذه المدرسة بكن بعد كدا هيركبوا 6 مواصلات علشان يروحوا المدرسة، شوفوا لنا فلوس بقي علشان تكفي، احنا موظفين اقصي راتب بنحصل عليه 2000 جنيه والسواق بياخد علي كل ولد 500 جنيه وانا عندي 3 ابناء يعني هدفع 1500 جنيه مواصلات فقط بدون اكل وشرب وملابس وكتب خارجية ودروس خصوصية اعمل ايه دلوقتي.
وأوضحت ان المدرسة بقول مليش دعوة والمديرية بتقول احنا مش مسئولين يبقي مين المسئول "احنا المسئولين" احنا اللي هنعلم اولادنا؟ دي بلدنا ودي مدرستنا واحنا قاعدين فيها وهما يتصرفوا دي مش مشكلتنا احنا دي مشكلتهم هما انهم عملوا مدرسة يكملوها.
واشارات ان اكثر من 40 طالب يتصرفوا لهم فى فصل والمدرسة مسئولة ووزير التربية والتعليم مسئول ومحافظ القليوبية مسئول ، انا ولي امر طالب عايزة اعلمه كويس ويشوفوا دي مسئولية مين؟ واحنا موجدين يجيبوا الشرطة ويجيبوا لنا العفريت الازرق احنا موجدين اللي انتم عايزين تعملوا اعملوا، او تقعدوا اولادنا فى البيت وبلاش تعليم او تتصرفوا.
وتؤكد إحدى أولياء الأمور، أن لديها 5 أبناء فى مراحل مختلفة بالتعليم فى نفس المدرسة وعند نقل أحدهم لمدرسة أخري سوف يزيد الأعباء المادية عليهم قائلة" يجي المسئولين فى ياخدو كل دخلي ويوروني أزاي هيصرفوا علي أولادي ويعلمهم.
وأضافت هما فين المسؤلين وفين المحافظ نروح لمين ونشتكي لمين، هما كانوا بيدخلوا أولادنا من الأول ليه المدرسة دي وهما عارفين أن مفيش ليهم فصول قائلة "والله العظيم حرام عليهم بهدلتنا وبهدلة أولادنا".
فيما تقول احد اولياء الامور،احنا ولادنا مش عارفين بعد مايخلصوا ستة ابتدائي هيروحوا فين احنا عندنا أزمة كبيرة ومفيش حد حاسس بينا.
وتضيف ولي امر ، المشكلة أني انا ابني دلوقتي في سنة 6 ابتدائي ورايح أولي إعدادي وأخته في سنة 5 وابني الثالت في كي جي وان وأنا دلوقتي عندي ثلاث أولاد عشان أخرج واحد في أولي إعدادي والمدرسة أساسا كانت قايلانا هيا هتبقي إعدادي وثانوي ودلوقتي هتبقا إبتدائي بس وهنضطر أني احنا نخرج ابننا الكبير بردوا ودا هيعمل تشتيت للأسرة أني هو كان بينظم المصالح مع إخواته يعني باجيبهم معاه وبيروحوا وييجوا مع بعض دلوقتي انا هيبقا عندي مشكلة أني هوديه برا وأخته هتبقا هنا وأخوه التاني هيروح مدرسة برا لأني مش هيبقا في كي جي هنا فهيبقا عندي تشيتت في الأسرة.
