مركز تدريب صحة المرأة بالجيزة يوضح إرشادات الصيام لمرضى السكرى فى شهر رمضان

وجهت الدكتورة أميرة حسن القائم بأعمال مدير مركز تدريب صحة المرأة بالجيزة نصائح يجب على مرضى السكرى اتباعها لصيام صحى برمضان هذا نصها : "عزيزتي المرأة،
مرض السكر منتشر في العالم كله و على الرغم من إن مضاعفاته خطيرة إلا إن المضاعفات دي يسهل تفاديها بإذن الله بالإلتزام بالعلاج في مواعيده مع الأكل الصحي و قياس مستوى السكر بالدم و المتابعة المستمرة مع الطبيب المعالج و ممارسة الرياضة.
مريض السكر ممكن يصوم بأمان بالشروط الآتية:
١_يكون مستوى السكر في الدم منضبط لا عالي والا منخفض.
٢_ضرورة قياس السكر الصبح بعد الإستيقاظ و بعدها ب٣ ساعات و قبل ميعاد الإفطار لأن ده أكتر وقت ممكن مستوى السكر فيه ينخفض عن المعدل المقبول.
٣__مراعاة شرب المياه ( تقريبا من ٨ ل١٠ أكواب) بين الإفطار و السحور لتجنب الجفاف.
٤_يفضل تفطري على تمر لأنه بيرفع مستوى السكر بسرعة لكن راعي إنك ماتزوديش عن ٣ تمرات في اليوم، و إحرصي إن وجبة الإفطار يكون فيها خضار كتير و بروتين و نسبة قليلة من النشويات، و ماتنسيش تقيسي السكر بعد الإفطار ب٣ ساعات.
٥_ضرورة الإلتزام بالعلاج بين الفطار و السحور سواء كان فموي أو إنسولين و تقسيم الوجبات زي ماوصف لك الطبيب المعالج.
٦_تجنبي تماما ممارسة الرياضة أثناء ساعات الصيام، تفضل ممارستها بعد الإفطار بساعتين.
٧_أحصلي على قسط كافي من النوم و لكن تجنبي تماما النوم قبل الإفطار مباشرة لأن ده أكتر وقت السكر ممكن يقل فيه.
٩_راقبي نفسك طول ساعات الصيام، لو حسيتي بدوخة، زغللة، هبوط، رعشة، تعرق، سرعة في ضربات القلب إفطري فورا.
إمتى الصيام يكون خطر لمريض السكر؟
_لو المريض عنده مشاكل في الكلى أو القلب أو الأوعية الدموية.
_لو المريض بيتعالج بمضخة إنسولين.
_الحامل المريضة بداء السكر.
_لو المريض مستوى السكر عنده دايما عالي أو منخفض و مااتظبطش قبل رمضان.
_لو المريض اتعرض لغيبوبة سكر خلال ٣ شهور قبل رمضان.
_النوع الأول من مرض السكر.
أخيرا ماننساش الكشف و المتابعة متوفرين بالمجان بمبادرة رئيس الجمهورية للصحة العامة و من خلالها بيتم الكشف عن الأمراض المزمنة زي السكر و الضغط و الإعتلال الكلوي...إلخ و كمان بيصرف علاج للحالات.
مع تمنياتنا بالشفاء العاجل و العافية للجميع بإذن الله
القائم بأعمال مدير المركز" .