حوادث وقضايا
بطل من الداخلية ساهم فى انقاذ 4 ارواح ٠٠٠ابطال مصرنا الغالية
الثلاثاء 05/أغسطس/2025 - 02:02 م
طباعة
sada-elarab.com/773362
في الحـ.ـريق المرعب اللي هز مدينة الباجور فى المنوفية، بسبب أسطوانات الغاز اللى اشتعلت واحدة ورا التانية داخل أحد المطاعم، والدخان غطى المكان، والنـ.ــار كانت بتبتلع كل حاجة في طريقها.. فيه ناس اختارت تقوم بعمل بطولى.
وفي وسط المشهد ده، كان فيه ملازم شاب من أبناء الباجور وأحد الوجوه المشرفة بوزارة الداخلية، اسمه سعد البدري، ما وقفش يتفرّج.. وما استناش أوامر.
شاف البنات الأربعة محبوسين فوق، والدخان بيخنقهم، والنـ ـار بتحاصرهم من تحت، فقرر يتحرك فورًا، وينضم للشباب الجدعان اللي طلعوا من العمارة المجاورة لمحاولة إنقاذ البنات.
طلعوا على السطح، لكن اتفاجئوا إن الباب مقفول.. والدقايق بقت بتعدّي كأنها ساعات، والبنات بين الحياة والموت، الدخان كان بيزيد.. والاختناق مسألة وقت.
لكن الأمل جه في صورة سلم طوارئ صغير جنب الأسانسير.
الملازم سعد ساعد في نقله وتثبيته بين العمارتين، وبدأ مع باقي الأبطال ينقلوا البنات واحدة ورا التانية، بحذر، وبقلب مليان رجولة وشهامة.
وفي الآخر، البنات الأربعة خرجوا سالمين.. لكن المشهد فضل محفور في قلوبنا، لأن فيه ناس اختارت تكون الحياة سبب على إيديها.
الملازم سعد البدري مش مجرد ضابط.. ده شاب مصري من طينة الناس الجدعان، اللي لما بتيجي المواقف، بيتقدّموا من غير حسابات.
تحية كبيرة ليك يا سعد، ولكل واحد ساهم في إنقاذ البنات.. أنتم وش الخير، واللي بترفعوا راس الباجور ومصر كلها.
