محافظات
مركز تدريب صحة المرأة بالجيزة يوجه نصائح للحماية من أضرار ارتفاع درجة حرارة الجو
الإثنين 24/يونيو/2024 - 06:03 م
طباعة
sada-elarab.com/729243
وجهت الدكتورة أميرة حسن القائم بأعمال مدير مركز تدريب صحة المرأة بالجيزة نصائح للحماية من أضرار ارتفاع درجة حرارة الجو وهذا نصها "#في_فصل_الصيف.
كلنا حاليا بنعاني من الحر الشديد نظرا لارتفاع غير مسبوق في درجة حرارة الجو، أسباب كتير أدت للتغيرات المناخية اللي بنشوفها دلوقتي والإنسان طبعا وممارساته الخاطئة ضد البيئة المتهم الرئيسي عشان كدة لازم نعمل كل جهدنا عشان نواجه الحر ده ونتجنب أضراره وخطورته و نحاول نتعاون لحل المشاكل وتحسين البيئة من حوالينا.
من أضرار التعرض المفرط لأشعة الشمس فوق البنفسجية:
-إتلاف الحمض النووي لخلايا الجلد.
-تعرق مفرط و ده ممكن يسبب جفاف بالجسم.
-تأثير سلبي على الأداء الذهني نتيجة الإنزعاج من الحر و إرهاق و توتر.
-تمدد بالأوعية الدموية و إنخفاض بضغط الدم.
-إجهاد حراري: دوخة، غثيان و خفقان.
-ضربة شمس.
عشان نحمي نفسنا و أطفالنا من الأضرار دي:
١-الحرص على شرب المياه بكثرة لتعويض السوائل اللي بيفقدها الجسم أثناء التعرق و لتجنب الجفاف.
٢-نحرص على ارتداء ملابس خفيفة فضفاضة بألوان فاتحة عشان تعكس حرارة الشمس و تكون مصنوعة من القطن أو الكتان عشان تسمح بالتهوية و امتصاص العرق، و يا ريت نتجنب تماما القماش اللي فيه بوليستر.
٣-ارتداء قبعات أو استخدام الشمسيات لحماية الرأس و الوجه بالذات للأطفال.
٤-وضع واقي للشمس قبل الخروج في الشمس ب٢٠ دقيقة لحماية الجلد من أشعة الشمس فوق البنفسجية، المهم يكون واقي الشمس مناسب لنوع البشرة و بالنسبة للأطفال فيه أنواع كتير مناسبة ليهم بالذات اللي بتحتوي على الزنك و فيه منها مقاوم للماء لو حد هينزل البحر مثلا أو حمام السباحة.
٥-الحرص دايما على التواجد بمكان مظلل جيد التهوية.
٦-الاستحمام بالماء الفاتر.
و بالنسبة للبيئة يا ريت لو الناس تتعاون مع المسئولين في مناطقهم السكنية و يشجعوا على زراعة الأشجار و نتصدى جميعا لكل مظاهر تلويث البيئة و نواجه الممارسات الخاطئة اللي بسببها بتحصل التغيرات المناخية اللي بنشوفها دي...لازم نعرف إن البيئة دي بيتنا كلنا و إن أي إساءة من ساكن للبيت ده بتتسبب في معاناة السكان كلهم، الحفاظ على البيئة مش رفاهية ده أساس عشان نعرف نعيش.
