طارق الدسوقي: رفضت أتوسط لولادي علشان يدخلوا الوسط

أكد الفنان طارق الدسوقي، أنه رفض التوسط لأولاده لدخول الوسط الفني، بجانب تعليقه على دور النقابة في تشغيل الفنانين.

وقال طارق الدسوقي، في لقائه مع الإعلامية إنجي هشام، في برنامج "المنسي" المذاع عبر شاشة قناة "هي": المفروض النقابة عليها دور كبير اوي في تقليل الفجوة بين الجيل القديم والجديد، وميكونش دورها متوقف بس على المرض والجنازات، المفروض ترتقي بمستوى المهنة، والمفروض تهتم بثقافة الفنانين والأعضاء بتوعها ويكون في صالون ثقافي أسبوعي أو شهري.

وتابع: أشرف زكي دفتني وإحنا أصدقاء جدًا ومكناش بنفترق لا ليل ولا نهار، هل هو مش عارف أن طارق بعيد عن الشاشة؟ ده جيله والمفروض هو اللي يبادر ويسأل أنت بعيد بمزاجك؟ أنت قيمة وقامة وواجهة مشرفة إزاي مش متواجد، طب أنت محتاج حاجة أو مريض؟ ده دور النقابة.

وأضاف: رفضت أتوسط لولادي علشان يدخلوا التمثيل، والفن مافيهوش واسطة ولا يمكن تصنع نجم والحكم للجمهور، وأحمد ابني مشي في الطريق بشكل صح هو خريج كلية الإعلام وبياخد ورش تمثيل، وأنا مبتدخلش أني أكلم له مخرج أو منتج، وعلى الرغم من أنه جان وفيه كل مواصفات النجم ولكن سايبه يتعب زي ما أنا تعبت.

وأردف: أنا لو مش مقتنع برسالة الفن كنت أعلنت اعتزالي، ما أنا بعيد بقالي 10 سنين وخلاص الجاي مش قد اللي رايح، بس أنا لايمكن أعمل كده، المهنة دي أنا قعدت 40 سنة فيها وعملت فيها رسالتي على أكمل وجه.

كما كشف تفاصيل تعاونه مع الفنانة شادية: الأستاذ أشرف فهمي المخرج، كان هيضربني وكان عنده حق لأنه كان تصوير فينال فيلم لا تسألني من أنا، وكان فيه كل الأبطال فوق السطح والدنيا برد جدًا، وأنا إتأخرت في الامتحان وقال لما يجي قولولي، وطبعًا مدام شادية لما جيت حجزت وقالت له لو لمسته أنا همشي الولد عنده امتحان هيعمل إيه.

واختتم: أنا شايف أن شادية النقاد مدوهاش حقها، مفيش دور معملتهوش كان المفروض يرصد تاريخها الفني، هي ممثلة عبقرية وعظيمة وهي مغنية كمان.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.